मुंबई :- मुंबईतील देवनार कत्तलखान्यात बकरी ईदनिमित्त बकऱ्यांचा बाजार भरवण्यास मनसेने विरोध केला आहे. मुंबईत करोनाचं सर्वात मोठं संकट असल्याने त्यामुळे यंदा देवनारमधील बकऱ्यांचा बाजार भरवू देऊ नका, असं अशी मागणी मनसेने राज्य सरकार आणि मुंबई महापालिकेकडे केली आहे. बकरी ईद निमित्त दरवर्षी देवनारच्या कत्तलखान्यात बकऱ्यांचा बाजार भरवला जातो. मात्र, यंदा करोनाचं मोठं संकट निर्माण झालं आहे. मुंबईत तर करोनाचा कहर निर्माण झाला आहे. यापार्श्वभूमीवर बकरी ईदच्या दिवशी देवनारमधील बकऱ्यांच्या बाजारात परराज्यातून लोकं आल्यास करोनाचा प्रादुर्भाव वाढण्याची शक्यता नाकारता येत नाही, त्यामुळे यंदा देवनारमधील बकऱ्यांचा बाजार भरवू नका, अशी मागणी मनसेने राज्य सरकार आणि महापालिकेला केली आहे. कुणाच्याही धार्मिक भावना दुखावण्याचा यामागे हेतू नाही, केवळ करोनाचं संकट असल्याने मुंबई करोनाच्या संकटातून वाचावी हाच त्यामागचा हेतू असल्याचंही मनसेने स्पष्ट केलं आहे. महाराष्ट्र नवनिर्माण सेनेचे महाराष्ट्र सरचिटणीस राजा चौघुले यांनी राज्याचे मुख्यमंत्री उद्धव ठाकरे, उपमुख्यमंत्री अजित पवार, अल्पसंख्यांक मंत्री नवाब मलिक, महापौर किशोरी पेडणेकर, देवनार पशुवधगृहाचे व्यवस्थापक, मुंबई पोलीस आणि मुंबई महापालिकेला आठ दिवसापूर्वीच पत्र लिहून यंदा देवनारमध्ये बकऱ्यांचा बाजार भरवण्यात येऊ नये, अशी मागणी केली आहे. तसेच एक व्हिडिओ व्हायरल करून राजा चौघुले यांनी देवनारबाबतची मनसेची भूमिकाही स्पष्ट केली आहे. दरवर्षी बकरी ईदला देवनार कत्तलखान्यात देशभरातून कुर्बानीसाठी ३ लाख बकरे आणले जातात. यावेळी शेकडो ट्रक भरून लाखो बकरे आणले जातात. तसेच त्यानिमित्त १५ ते २० लाख विक्रेते आणि खरीददारही कत्तलखान्यात येत असतात. बकरी ईदच्या आठ ते दहा दिवसआधीच कत्तलखान्यात लगबग सुरू होते. त्यामुळे देवनारमध्ये सोशल डिस्टन्सिंगचा फज्जा उडणार आहे. कुणालाही सोशल डिस्टन्सिंग पाळता येणं शक्यच राहणार नाही. परिणामी करोना व्हायरसचा प्रादुर्भाव वाढण्याची शक्यता आहे. देवनारच्या आसपासचा गोवंडी, चेंबूर, घाटकोपर, टिळकनगर आणि मानखुर्द हा परिसर झोपडपट्टीचा परिसर असल्याने या परिसरात वेगाने करोना फैलावण्याची शक्यता नाकारता येत नाही, त्यामुळे देवनारमध्ये यंदा बकऱ्यांचा बाजार भरवण्यास मनाई करण्यात यावी, अशी मागणी चौघुले यांनी केली आहे. देवनारमधून परराज्यातून हजारो लोक येतात. त्यामुळे त्या प्रत्येकाचीच करोना चाचणी करणं शक्य नाही. त्यांचं स्क्रिनिंगही होणं शक्य नाही. त्यासाठी लागणारा मोठा वैद्यकीय स्टाफ उपलब्ध करून देणं हे प्रशासनाच्या आवाक्याबाहेरचं आहे, असं सांगतानाच यंदा करोनाचं सावट असल्याने राज्य सरकारने करोना रोखण्यासाठी सर्वच धर्मांना काही बंधने घातली आहेत. त्यामुळे बकऱ्यांचा बाजारही भरवण्यात येऊ नये. यामागे कुणाच्याही धार्मिक भावना दुखावण्याचा हेतू नाही. कुणाचाही अनादर करण्याचाही हेतू नाही. करोनाच्या संकटातून मुंबई आणि महाराष्ट्राला वाचवायचे असेल तर या गोष्टी कराव्याच लागतील, असंही चौघुले यांनी म्हटलं आहे. गेल्याच महिन्यात एम-पूर्व आणि एम-पश्चिम विभागाला रेड झोनमध्ये टाकण्यात आलं होतं. महापालिकेने या विभागाला करोनाचा हॉटस्पॉट म्हणून घोषित केलं होतं. त्यामुळे राज्य सरकार आणि महापालिकेने त्याचं गांभीर्य समजावून घ्याव, असंही त्यांनी म्हटलं आहे.

LEAVE A REPLY

Please enter your comment!
Please enter your name here